الجمعة، 28 مارس، 2014

عسكر و اخوان

المكان: مصر (ام الدنيا)
الزمان: عام ٢٠١٤
الموضوع: ما وصلنا اليه بعد ٣ سنين من ثورة يناير
بعد الاحلام و الاوهام وبعد الصراع وبعد الفرحه و بعد الدم وبعد استفتاءات و انتخابات وبعد وبعد وبعد كتييييير
وصلنا لإيه؟؟؟!!!
شلنا مبارك وفرحنا . مسك المجلس العسكرى و استنينا ومسك الاخوان واحبطنا ونزلنا و ثورنا والجيش وقف معانا  و شيلنا الاخوان ومسك عدلى منصور اللى هو رئيس المحكمه الدستوريه العليا

مبارك بيتحاكم ونظامه معاه و مرسى بيتحاكم ونظامه برضه معاه والشعب وصل لمرحلة انه مبقاش حتى عارف هو عايز ايه ولا المعارضه مفهوم هيابتطالب بإيه و من مين ولا الثوار اللى نزلوا فى ٣٠ يونيو عارفين هما عايزين ايه .. لا كنا عايزين عسكر ولا اخوان بس فى النهايه دايمآ بنلاقى نفسنا محاصرين بالطرفين و مفيش اختيار تالت وقعوا الاخوان والكوره فى ملعب العسكر الكل متحفز و الكل مستنى فى اللى مستنى يغلطوا وفى اللى مستنى ينجحوا و فى اللى مابقاش فارقه معاه عشان عرف انه برا اللعبه .. لعبة الاختيار

الخميس، 16 يونيو، 2011

خدعوني فقالوا....!

خدعوني فقالوا ثوره،، خدعوني وقالوا هانسقط النظام،، خدعوني وقالوا مصر هاتبقي أحلي،، خدعوني وقالوا هانكون بلد ديمقراطي وهانعيش في حريه وهانحاكم الحراميه والقتله والمجرمين!!!
خدعوني فقالوا ثوره ثوره حتي النصر.
الثوره بقت خدعه بس القضيه هنا هل إتخدعنا ولا إحنا اللي خدعنا نفسنا كان كلنا إيمان بهدفنا وكلنا إصرار علي تحقيقه..دلوقتي فين هو النصر وفين انجازات الثوره وفين حماسنا وفين إرادتنا!!!؟؟
إحنا زي اللي هدينا عماره ايله للسقوط عشان نبنيها وبعد ما هديناها سبناها ومشينا. فين اسقاط النظام وفين تطهير ماسبيرو وفين إعادة هيكلة الداخليه فين محاكمة الفاسدين فين حق الشهداء والمصابين؟ بيتهيألي لو كنا عايزين كل ده يحصل كان حصل بس المجلس العسكري نجح في انه يكسر الإراده دي جوانا سواء بتجريم الإعتصامات والمحاكمات العسكريه للمتظاهرين و و و و و .. والنتيجه ان مابقاش لينا أي رد فعل غير اننا نعترض ونغضب ونتضايق ونثور بس علي الإنترنت..
وارجع تاني لسؤالي إحنا اللي خدعنا نفسنا لما حلمنا أوي ولا إتخدعنا؟؟

welcome

بسم الله الرحمن الرحيم
بشري سااااااااره لكل مصر
بعد طول تفكير وبعد طول إنتظار تم بحمد الله إفتتاح مدونتي "أي كلام فاضي معقول".
والله الموفق